JANIUAY, ILOILO – Nagsungka sa militar ang duha ka babayi nga miyembro sang New People’s Army nga naka-engkwentro sang 12th Infantry Battalion sang Philippine Army sang nagligad nga Agosto 26 kag Agosto 28 sa Brgy. Panuran kag Aglobong, Janiuay, Iloilo.
Sa interview sang Bombo Radyo kay Brigadier General Marion Sison, Commander sang 301st Brigade sang Philippine Army, iya ginpahayag nga ang duha ka mga rebelde ang ginkilala nga sanday alyas JL, 20 anyos, kag Alexa, 19 anyos, nga miyembro sang SYP Baloy Suyak Platoon Central Front Komiteng Rehiyon Panay.
Suno kay Sison, gin-ako sang duha nga sila ang nagapanag-iya sang mga gamit nga nasapwan sang Philippine Army pagkatapos sang engkwentro.
Ang pagsungka sang duha suno kay Sison ang natigayon paagi sa isa ka barangay kagawad nga amo ang nagdala sa ila sa headquarters sang 12th Infantry Battalion sa banwa sang Calinog.
Santo sa pahayag sang duha ka rebelde, ginbayaan sila sang ila mga kaupod pagkatapos sang engkwentro.
