ILOILO CITY – Duha na gid lamang ka banwa sa probinsya sang Iloilo ang nagapabilin nga wala sang kaso sang dengue base sa pinakaulihi nga report sang Iloilo Provincial Health Office.
Ang duha ka mga banwa amo ang Anilao kag San Rafael.
May yara sang pinakamadamo nga kaso sang dengue ang banwa sang San Joaquin nga may 105; ginasundan sang Guimbal nga may 47 ka kaso kun sa diin, duha ang patay; Tubungan nga may 46; Miag-ao nga may 21 ka kaso kun sa diin, isa ang patay kag Oton nga may 21 ka kaso.
Sa interview sang Bombo Radyo kay Dr. Ma. Socorro Quiñon, pinuno sang Iloilo Provincial Health Office, iya ginpahayag nga ang mga banwa nga may madamo nga kaso ang nagdeklarar na sang state of calamity.
Anum sa pito ka banwa sa first district sang Iloilo ang nadala sa top 10 nga may pinakamadamo nga kaso sang dengue nga ginalakipan sang San Jaoquin, Guimbal, Tubungan, Miag-ao, Oton kag Tigbauan samtang ang Igbaras ang yara sa ika-21.
Suno kay Quiñon, ini bangud nga lapitanay lang ang mga ini.
Ang mga barangay naman nga may yara sang na-record nga clustering of cases amo ang masunod:
Pandan, Dueñas;
Tamboilan, Dumangas;
Bongol San Vicente, Burgos Gengos (Pob.), Cabasi, Bagumbayan (Pob.) kag Cabubugan sa Guimbal;
Tumagboc sa Miag-ao;
Sta. Rita sa Oton;
Cau-ayan sa Pototan;
Igburi, Qui-anan, Lawigan kag Siwaragan sa San Joaquin;
kag Teniente Benito kag Lanag Sur sa Tubungan.
Sa kabilugan, may yara na sang 454 ka kaso sang dengue sa probinsya kun sa diin, anum ang napatay.
Padayon sa gihapon ang panawagan sang provincial government sa publiko nga ipabilin ang katinlo sang palibot.
Sang Hunyo 17, ginpatigayon ang kick-off sang cleanup kag clearing operation batok sa dengue kag baha sang Iloilo Provincial Government.
Ang “Limpyo sa Hunyo 2022: Panglimpyo Para sa Dengue kag Baha” nga ginapatuman paagi sa Executive Order No. 271 ang isa ka convergence program nga nagatuyo nga matapna ang pagduging sang dengue paagi sa pagpatigayon sang mas ginpabaskog nga implementasyon sang 5S Strategy batok sa dengue nga amo ang (1)search and destroy of mosquito breeding sites,(2) securing self-protection,(3) seeking early consultation, (4)supporting fogging/spraying only in hotspot areas, (5)kag observance of safety and health protocols.
