ILOILO CITY — Nagpasensyahanay na lang ang duha ka mga biktima kag driver matapos nga gin-settle sang Iloilo City Public Safety and Transportation Management Office (PSTMO) ang ginapahayag natabo nga pagpakita sang driver sang iya pribado nga parte sang lawas sa pasahero sini.
Sa interview sang Bombo Radyo kay Mr. Jeck Conlu, pinuno sang nasambit nga talatapan, iya ginpahayag nga nagpangayo sang pasensya ang driver sa mga biktima sa diin gilayon man nga ginbaton sang duha ka mga pasahero sini.
Suno kay Conlu, ang driver ang nag-substitute lamang sa orihinal nga driver gid mismo sang amo nga taxi.
Ginpahayag man sini nga ang driver ang makapila na ka beses nga nagsaylo sang kompaniya.
Gin-athag man ni Conlu nga isolated case lang ang natabo kag ang Iloilo City ang nagapabilin sa gihapon nga safe sakyan sang mga taxi.
Nahibaluan nga nagabantay sang jeep ang duha ka mga biktima apang nagdesisyon nga magsakay na lang sa taxi padulong sa isa ka mall sa syudad.
Samtang nagabyahe padulong sa mall, gulpi lang nga ginpaguwa sang driver ang iya nga pribado nga parte sang lawas nga ginkakulba sang mga pasahero sini.
Matapos ma-settle ang natabo nga insidente, mas ginpakamaayo na lang sang duha ka pasahero nga indi na magkaso batok sa driver.
