ILOILO CITY – Nadugangan sang 21 ang kumpirmado nga kaso sang Coronavirus Disease 2019 (COVID-19) kun sa diin naglab-ot na sa 353 ang kabug-usan nga numero sa Western Visayas.
As of July 2, 22 sa 527 ka laboratory results ang nagpositibo apang isa diri ang nagpositibo sa repeat test rason nga 21 lang ang counted.
Nadugangan naman sang 9 ang 139 nga naka recover samtang 11 sa gihapon ang patay.
Lakip sa mga pasyente nga nag-ayo amo sanday:
Patient no. 157 – 38 anyos nga babayi sang Bacolod City
Patient no. 160 – 40 anyos nga lalaki sang Bacolod City
Patient no. 161 – 38 anyos nga babayi sang Bacolod City
Patient no. 162 – 35 anyos nga lalaki sang Bacolod City
Patient no. 165 – 36 anyos nga babayi sang Cadiz City, Negros Occidental
Patient no. 167 – 43 anyos nga lalaki sang Silay City, Negros Occidental
Patient no. 173 – 23 anyos nga lalaki sang Bacolod City
Patient no. 203 – 26 anyos nga lalaki sang Bacolod City
Patient no. 228 – 18 anyos nga lalaki sang Bacolod City
Kalabanan sa mga nagpositibo kag mga nag-ayo ang ginalakipan sang Locally Stranded Individual kag repatriated Overseas Filipino Worker.
Sa 21 ka mga nagpositibo, isa lang ang admitted sa hospital samtang ang 20 naman ang naka facility quarantine.
Kun pahat-pahaton, ang Aklan ang may anum ka COVID-19 cases, Antique ang may 15, Capiz ang may 6, Iloilo Province ang may 39, Negros Occidental ang may 3, Bacolod City ang may 11, Iloilo City ang may 29 kag 244 sa mga repatriates.
Samtang, nagapabilin nga asymptomatic ang 2 ka bulan nga lapsag nga amo ang pinakabata sa 21 ka mga nagdugang sa kumpirmado nga kaso sang Coronavirus Disease 2019 (COVID-19) sa Western Visayas.
Sa interview sang Bombo Radyo kay Dr. Lyle Love Louise Ladera, Municipal Health Officer sang Moises Padilla, Negros Occidental, iya ginpahayag nga sang Hunyo 21 nagpauli ang lapsag kaupod ang iloy kag ang iya tiyo halin sa Quezon City.
Suno kay Ladera, gin-una sa pagpaidalom sa RT-PCR test ang lapsag kag nakumpirma nga positibo sa COVID-19 samtang ginahulat pa ang resulta sang RT-PCR test sang iloy kag sang tiyo nga sa subong nagapabilin nga asymptomatic.
Ginpahayag ni Ladera nga ang lapsag ang yara sa quarantine facility sa banwa sang E.B. Magalona kaupod ang iloy kag ang tiyo nga residente sang Odiong sa banwa sang Moises Padilla.
Sa pagpaathag ni Ladera, mahimo nga nalatnan ang lapsag paagi sa iya iloy ukon indi gani, nalatnan ang lapsag samtang nagabyahe papauli sa Western Visayas.
