SAN DIONISIO ILOILO CITY– Posible nga magapangatubang sang kaso ang katapo sang Sangguniang Bayan kag Barangay Kagawad sa San Dionisio Iloilo matapos ginpasulod sa ila banwa ang persona nga ginakabig ‘probable’ COVID-19 patient.
Sa interview sang Bombo Radyo kay San Dionisio Mayor Larry Villanueva, iya ginpahayag nga posible magapangatubang sang kaso nga paglapas sa curfew ang mga elected officials bangud kaagahun natabo ang pagpasulod sa amo nga persona kag bayolasyon sa protocol, bangud kun may yara sang magapauli sa ila banwa, kinahanglan anay nga magpaidalom ini sa mandatory facility quarantine sa sulod sang 14 ka adlaw.
Suno kay Villanueva , mismo si Sangguniang Bayan Member Jess Albania gamit ang iya pribado nga salakyan kag si Barangay Kagawad Robert Palparan sang Barangay Pase ang nagsugat sa amo nga persona nga nagatrabaho sa syudad sang Iloilo.
Nakibot man siya sa natabo suno sa alkalde, bangud ang isa sa imbolbado sa pagpasulod sang posible COVID-19 Patient amo ang katapo sang Sangguniang Bayan nga kuntani nakahibalo sang protoco.
Ginapahayag nga may yara sang flu-like symptoms ang amo nga persona.
Pahayag pa ni Villanueva, matapos nakabatun siya sang impormasyon santo man sa report sang barangay health workers kag iban nga barangay officials, gilayun nga ginpaidalom sa mandatory strict home quarantine ang SB member kag iya pamilya, Barangay Kagawad kag iya man pamilya, mismo ang persona nga ginpasulod lakip na ang ila pamilya, kag katapo sang Sangguniang Bayan bangud nagtambong pa sa sesyon si Sangguniang Bayan Member Jess Albania.
Dugang pa sang natungdan, napaidalom na sa swab test ang persona nga ginpasulod sa ila banwa kag ginahulat nalang nila nga makagwa ang resulta.
