ILOILO CITY – Duha ka empleyado sang Local Economic Enterprise Office (LEEO) nga assigned sa fish section sang Iloilo Terminal Market ang nagpositibo sa coronavirus disease 2019 (COVID-19).
Sa interview sang Bombo Radyo kay Public Safety and Transportation Management Office (PSTMO) Head kag Iloilo City COVID-19 Focal Person Jeck Conlu, iya ginpahayag nga ini ang rason kun ngaa magapabilin nga sirado ang merkado kag indi pa pagbuksan sa publiko.
Ginpahayag ni Conlu nga apisar yara sa estable nga kondisyon ang duha ka empleyado, siguraduhon sang Iloilo City Government nga safe ang tanan antes pahanugutan nga magbalik ang mga manugbaligya sa sulod.
Nagadali ang tanan suno kay Conlu nga mabuksan ang Iloilo Terminal Market apang dapat anay nga maghulat-hulat agud malikawan ang pagtaas sang local cases sang COVID-19.
Samtang, gin-ako ni Conlu nga nabudlayan ang Iloilo City Government sa pagkontrol sa mga tawo kag manugbaligya nga ginpahamtang sa dalan Jalandoni kag Ledesma sa Iloilo City Proper.
Ini bangud gamay lang ang mga personnel sang PSTMO nga amo ang nagapangsaway sa mga wala nagatuman sang minimum health standards batok sa COVID-19.
Suno kay Conlu, umpisa sang ginpasirado ang Iloilo Terminal Market, madamo na ang gin-isyuhan sang citation ticket bangud wala sang face mask kag wala nagasunod sa physical distancing.
Bangud sini, ginsuguran na sang Iloilo City Government subong nga adlaw ang pagplastar sang mas ginpahugot nga pagsulundan.
Siraduhan ang area sa amo nga mga dalanon umpisa 4:00 am- 6:00 am bangud ini ang time period kun sa diin tuman ka damo ang nagapaninda.
Indi man pagpahanugutan nga maka-extend pa ang mga manugbaligya sang ila pwesto kag nagpaandam si Conlu nga mapilitan ang mga PSTMO personnel nga kumpiskaron ang mga baligya sang mga vendors nga salawayon.
Sa suhestyon nga buksan na lang ang merkado kag ibalik ang mga vendors sa sulod, ginpahayag ni Conlu nga ginaproseso na ini sa subong.
Iga-require man sa mga manugbaligya nga magsuksok sang face shield kag face mask kag sa tion nga may maglapas, kuhaan sila sang pwesto sa amo nga merkado.
