ILOILO CITY–Nagpasa na sang affidavit of non-interest ang duha ka mga estudyante nga nakita sa video nga kuha spy camera nga gintakod sang isa ka manunudlo sa sulod sang confort room sang Sinamay National High School.
Sa interview sang Bombo Radyo kay Police Inspector Danilo Noca, hepe sang Alimodian Municipal Police Station, iya ginpahayag nga indi na interesado pa ang duha ka estudyante nga magpasaka sang kaso batok sa manunudlo nga si Jaynus Amolar.
Ang isa sa mga estudyante ang menor de edad samtang ang isa naman ang yara na sa legal ang edad.
Ang duha ang nakita sa video nga kuha sang spycam nga nagagamit sang comfort room.
Sa pihak sini, gin-athag ni Noca nga indi sila mag-untat sa pagpangita sang iban pa nga witness agud nga mapasakaan sang kaso ang manunudlo.
Samtang, ginpaathag naman sang pamilya sang isa sa mga estudyante kun nga-a indi na sila magpasaka sang kaso batok sa spycam teacher.
Sa interview sang Bombo Radyo kay alyas Inday, magulang sang isa sa mga estudyante, iya ginpahayag nga luyag kuntani nga magpasaka sang kaso ang iya manghod apang nmahuya nga mag-atubang sa mga tawo.
Dugang pa sang natungdan, nagalapta na ang video clip sa diin makita ang duha ka estudyante nga nagagamit sang comfort room.
Wala naman nagasulod sunu kay alyas Inday ang iya nga manghod sa eskwelahan bangud indi niya masarangan ang kahuy-anan.
Tuyo sang Depertment of Education (DepEd) nga magpasaka sang kaso kontra kay Amolar.