Arestado sa drug buy bust operation sa General Hudges, Iloilo City Proper ang duha ka mga lalaki nga may wala-tuo nga record sang pagpangawat sa syudad, Hulyo 15.
Ini amo sanday Alias Edwin, 33, kag alias Marvin, 36, lunsay mga residente sang Zone 10, Barangay Calaparan, Arevalo.
Sa interview sang Bombo Radyo kay Police Captain Roque Gimeno III, hepe sang Iloilo City Police Station 1, iya ginpahayag nga nakumpiskar sa duha ang 22 ka sachets sang suspected shabu lakip ang buy bust item nga ginabanta nagabug-at sang 67 gramos kag may standard drug price nga P455,600.
Suno kay Gimeno, si alias Marvin ang ginatudlo nga lider sang kinawatay sa Iloilo samtang kahimbon man sini si alias Edwin sa pagpangawat kag pagbaligya sang iligal nga droga.
Antes ang drug buy bust, may kaso nga murder si alias Marvin bangud sa duha ka tawo nga ginpatay sang 2012 apang na-areglo kag naka-guwa sang 2016.
Magluwas diri, pito ka beses man nga ini nga na-aresto bangud sa kaso nga pagpangawat kag nadakpan man sang 2021 bangud sa kahilabtanan sa iligal nga droga.
Sa record sang pulis, may tatlo naman ka kaso sang theft kag isa ka kaso sang robbery si alias Edwin.
Ginplastar ni Gimeno nga nagasaylo-saylo ang transaksyon sang duha rason nga sa City Proper pa nakabakal sang droga ang police operatives apisar nga sa Calaparan nagapauli ang duha.
Base sa panugiron sang mga subject, nagakuha sila sang suplay sang illegal drugs sa isa man ka bantog nga kawatan sa syudad apang nagpamalibad anay ang pulis nga hingadlan kun sin-o ini.#
