Yara sa gihapon sa state of trauma ang duha ka ilongga nga nagikan sa banwa sang Maasin, Iloilo matapos nga nasaksikhan ang sunog nga nagluntad sa pito ka high-rise towers sang Wang Fuk Court complex sa Tai Po, Hong Kong.
Sa interview sang Bombo Radyo kay Cynthia Dario, Head sang Public Employment Service Office (PESO) sang probinsya sang Iloilo, iya ginpahayag nga ang duha ka mga ilongga ang nagaubra bilang mga domestic helpers kag nagatinir man mismo sa amo nga building kag natabuan nga ara sa ti-on sang nagluntad ang sunog kag sa maayo nga kahimtangan, wala ang mga ini nasamaran.
Samtang, nakadepende naman sa request sang mga biktima ang bulig nga ipalab-ot sang Iloilo Provincial Government apang inkaso nga magpauli ang mga ini mahimo ini nga makabaton sang financial assistance nga P10,000.
Una na nga gin-activate sang PESO sang probinsya sang Iloilo ang “Operation Bulig Ilonggo” agud nga makapakig-angot sa mga Barangay PESO coordinators, Municipal PESO managers kag OFW association agud gilayon makakuha sang impormasyon inkaso may Ilonggo nga naulamid sa insidente.
Base sa regional data, yara sa 54,629 ka mga OFWs ang naga-ubra sa Hong Kong.
