ILOILO CITY – Nagapabilin sa ospital ang duha ka mga indibidwal matapos nabunggu-an sang closed van ang ginasakyan nga motorsiklo sa liku-on nga dalan sa Barangay Lapuz Norte, Lapuz, Iloilo City.
Sa interview sang Bombo Radyo sa traffic investigator nga si Police Staff Sergeant Rene Aguinaga, iya ginpahayag nga halin sa City Proper ang closed van samtang padulong naman sa coastal area ang motorsiklo sakay ang isa ka babayi kag isa ka lalaki sang natabo ang aksidente.
Nagagwa sa imbestigasyon nga una nga nakadanlog ang motorsiklo posible bangud sang pag-ulan-ulan, kag nag-overlap sa lane sang van.
Nagtinguha pa nga maglikaw ang van apang nalab-ot gid ang motorsiklo.
Pilas sa nawong ang na-agum sang duha nga nagpangabay nga indi paghingadlan.
Gina-imbestigaran pa sa subong kun bala, naka-inom sang makahulubog nga ilimnon ang driver sang motorsiklo bangud sang nakita nga beer sa lugar.
Samtang, nagpanugyan naman ang pulis sa driver kag tag-iya sang van nga buligan nalang sa pagpabulong sa ospital ang duha ka mga indibidwal.
Wala na gin-detain ang driver sang kag ginkuha nalang ang kinahanglanon nga impormasyon bangud nga nagagwa sang imbestigasyon nga wala ini sang sala sa natabo nga aksidente.
