Duha na naman ka journalists ang napatay sang nagbalik sa pagpang-atake ang Israel sa Hamas militants sa Gaza.

Ang isa ka biktima amo si Hossam Shabat nga naga-trabaho sa Al Jazeera Mubasher, samtang ang isa naman amo si Mohammad Mansour nga empleyado sang Palestine Today.

Napatay si Shabat sa northern Gaza sang gin-alegar nga gin-target sang Israeli forces ang iya salakyan. Antes siya napatay, napilasan man ini anay sa separado nga atake apang nagsiling ang mga kaupdanan sini nga nagpamilit gid ini nga padayunon ang pagbalita.

Sa Khan Younis sa southern Gaza naman napatay si Mansour samtang yara sa ila balay kaupod ang iya asawa kag anak bangud gin-alegar nga wala man lang sang warning nga natabo antes ang strike sang Israel.

Sunod man nga ginkondena sang Committee to Protect Journalists ang natabo nga pagpatay sa Palestinian reporters kag nagpanawagan sang independent international investigation kun hungod bala sila nga gin-target sang Israel Defense Forces.

“CPJ is appalled that we are once again seeing Palestinians weeping over the bodies of dead journalists in Gaza,” suno kay CPJ Program Director Carlos Martinez de la Serna samtang yara sa New York. “This nightmare in Gaza has to end. The international community must act fast to ensure that journalists are kept safe and hold Israel to account for the deaths of Hossam Shabat and Mohammed Mansour, whose killings may have been targeted. Journalists are civilians and it is illegal to attack them in a war zone.”

Kasunod sang amo nga insidente, nagsaka na sa 208 ang napatay nga media workers halin sang nag-umpisa ang gyera sa Gaza sang Oktubre 2023 santo sa record sang Government Media Office (GMO) sa amo nga teritoryo sa Palestine.