CALINOG, ILOILO– Boluntaryo nga nagsungka sa Charlie Company sang 61st Infantry Batallion, Philippine Army nga nakabase sa Camp Careon, Calinog, Iloilo ang duha ka katapo sang New Peoples Army (NPA).
Ang duha ka mga nagsungka ang ginkilala nga sanday Reynel Baybado Braga alyas MJ, 2, sang Brgy. Santiago, Barotac Viejo, Iloilo team leader sang squad 1 Front 13 Komiteng Rehiyon Panay kag si Allyn Rose Romero Diaz alyas Princess, 20, sang Brgy. Datagan, Calinog, Iloilo miyembro sang squad 2 Front 13 Komiteng Rehiyon Panay.
Ang duha ang nagsungka paagi kay Vice Mayor Renato Casinao.
Suno sa duha, nagdesisyon sila nga magsungka sadtong Hunyo 6, 2019 bangud sa naaguman nga gutom kag kabudlay lakip na ang ila kagustuhan nga makaangkon sang malinong nga kabuhi kag malayo sa arm struggle.
Sa interview sang Bombo Radyo kay Capt. Cenon Pancito III, tagpamaba sang 3rd Infantry Division sang Philippine Army, iya ginpahayag nga ila ginkalipay ang boluntaryo nga pagsungka sang duha rebelde.
Dugang pa ni Pancito, ang pagsungka sang duha ang nagapakita sang paghina na sang pwersa sang NPA sa Panay.
Nagpanawagan man si Pancito sa mga rebelde nga magbalik na sa sabak sang gobyerno agud makaangkon man sang malinong nga pagpangabuhi kag maka-upod ang ila pamilya.
Magpakig-angot ukon magpalapit lang sila sa pinakamalapit nga kampo sang militar bangud pagabatunon man sila sa tion nga magdesisyon na nga magsungka.
Samtang, ginkalipay man ni Lt. Col Joel Benedict Batara, Commanding Officer sang 61st Infantry Batallion Philippine Army ang pagsungka sang duha ka mga rebelde.
Ginpasalig man ni Batara nga makabaton ang duha sang benepisyo pinaagi sa Enhanced Comprehensive Local Integration Program (E-Clip).
Nahibaluan nga sa idalom sang E-Clip makabatun ang mga NPA returnees sang 65,000 financial assistance, libre nga housing kag libre nga edukasyon
