ILOILO – Ginalantaw sang Estancia Municipal Police Station nga isa ka ‘patalang’ ang pagbutang sang duha ka utod nga kawayan sa tupad sang lalaki nga nasapwan nga patay na sa higad sang karsada sa Barangay Daan Banua, Estancia, Iloilo.
Ang biktima ang nagasuksok sang violet nga T-shirt, maong nga dilargo, kag puti nga tsinelas.
Ginabanta naga-edad 14 tubtob 16 anyos ang biktima kag blonde ang buhok.
Sa interview sang Bombo Radyo kay Pol. Executive Master Sergeant Paul Toreco, imbestigador sang Estancia Municipal Police Station, iya ginpahayag nga wala sa gihapon matul-id ang motibo sang krimen.
Suno kay Toreco, ginalantaw nga ginhal-id lamang ang biktima sa hilamunan sa kilid sang karsada kag lain man ang lugar sa diin posible ini nga ginpulihan ukon ginbanggaan, kag ginkastigo.
Matawhay suno sa iya kag malimpyo ang lugar sa diin ginhal-id ang biktima.
