Duha ang patay kag duha man ang pilason sa natabo nga pagbunggu-anay sang pick-up truck kag angkar-angkar subong lamang nga hapon pasado alas-3:50 sa Brgy. Rumbang, Pototan, Iloilo.
Sa interview sang Bombo Radyo kay Police Master Sergeant Garry Peronilla, desk officer sang Pototan Municipal Police Station, iya ginkumpirmar nga duha ang patay kag duha ang pilason sa natabo nga vehicular accident sa nasambit nga lugar.
Isa sa napatay amo ang pasyente ang ginlabo sa Brgy Abangay, Pototan, Iloilo nga pagadal-on kun tani sa ospital sakay sa angkar-angkar, upod ang duwa niya ka utod.
Ginbawian man sang kabuhi ang isa pa kasakay nga naga-alalay sa pasyente nga ginlabo kag pilason naman ang driver sang angkar-angkar nga gindala na sa isa ka ospital sa syudad sang Iloilo.
Naka-agum man sang pilas ang driver sang pick-up truck apang luwas sa katalagman.
Sa subong, padayon pa ang imbestigayon sang mga kapulisan sa natabo nga vehicular accident kag sa natabo man nga paglabo-anay.
