Napuhag ang mga residente sa Iloilo City sa duha ka magkasunod nga sunog nga natabo kagab-i.
Ang una amo ang sa Veterans Village, City Proper kun sa diin isa ka balay ang totally damaged kag isa naman ang partially damaged.
Nag-umpisa ang fire incident 10:02 p.m., gindeklarar nga under control sang 10:23 p.m., kag ginkumpira nga fire out sang 10:29 p.m.
Naglab-ot ang status sa second alarm antes dalayon nga napalong sang Bureau of Fire Protection (BFP). Wala sang na-report nga indibidwal nga nasamaran.
1:50 kaina naman sang kaagahon, nagluntad man ang daku nga sunog sa Zone 11, Barangay Calaparan, Arevalo nga nagdangat sa third alarm.
Gindeklarar naman nga under control na ang sunog sang 2:35 a.m. kag fire out sang 3:03 a.m.
Suno kay Kagawad Rodrigo Montaño, walo ka balay ang totally damaged apang padayon pa ang assessment subong nga aga. May inisyal nga report nga kuryente ang ginhalinan sang kalayo.
Ginkumpirma man sang barangay nga may isa ka residente nga nasamaran bangud sa pagkaran-karan samtang nga nagapadayon ang sunog.
Padayon pa nga gina-imbestigaran sang BFP ang rason sang sunog sa magkatuhay nga lugar.#
(Photo: More Power/FB)
