GUIMARAS– Gindakop sang Bantay dagat ang duha ka mga mangingisda sa baybayon sang Guimaras bangud sa ilegal nga pagpangisda.
Ginkilala ang mga ini nga sanday Joely Hisona, 40 anyos kag Jerry Dela Torre, lunsay residente sang Cauayan, Negros Occidental.
Sa interview sang Bombo Radyo kay Police Master Sgt. John Rey Galo sang Nueva Valencia Municipal Police Station sa Guimaras, iya ginpahayag nga trolling ukon ang pag guyod sang lambat ang gin gamit nga paagi sang mga nasambit nga mangingisda nga ilegal kag wala ginapahinugatan bangud gina guba sini ang mga corals sa idalom sang dagat nga balay sang mga isda.
Aminado naman ang mga arestado nga ilegal ang ila nga ginhimo.
Sa subong yara na sa Bantay Dagat ang sakayang pandagat kag iban pa nga gamit sang duha ka mangingisda nga preso naman subong sa Nueva Valencia Municipal Police Station.
