Patay ang duha ka manug-salum sang fish cage matapos nalumos sa Brgy. San Isidro, Sibunag, Guimaras.
Ang mga biktima amo sanday Willard Nem, 47-anyos, residente sang Brgy. Sabang, Sibunag, Guimaras kag Joven Gutierrez Jr., 30-anyos, residente sang Brgy. San Enrique, San Lorenzo, Guimaras.
Sa interview sang Bombo Radyo kay PLt. Leonard Jardiolin, Officer-In-Charge sang Sibunag MPS, iya ginpahayag nga nagpalawod ang duha ka mga biktima kaupod ang iban pa gid sini nga abyan sakay sang bangka para magsalom sang fish cage.
Suno kay Jardiolin, sang wala na makabutwa ang isa sa mga biktima, gintinguhaan pa kontani nga salbaron sang isa pa gid sini ka kaupod apang nalumos man ini bangud sa kadalumon kag mabaskog nga sulog sang tubig.
Nahibaluan nga aga na sang nakit-an ang lawas sang duha ka mga biktima kag gilayon nga gindala sa Guimaras Provincial Hospital apang gindeklara nga dead on arrival (DOA).
