ILOILO CITY–Duha ang patay matapos nasagairan sang Ceres Liner kag nabunggu-an sang Elf truck ang motorsiklo sa Brgy. Balabag, Dumangas, Iloilo.
Ang mga biktima amo sanday Glen Dalisay sang Leganes, Iloilo kag Nelson Gatinao Jr. sang Brgy. Palaypay, Anilao, Iloilo nga driver sang motorsiklo.
Ang mga biktima ang manunudlo sa Iloilo State College of Fisheries (ISCOF) Barotac Nuevo, Iloilo sa diin ginapahayag nga idul-ong pa kuntani ni Gatinao papauli ang iya co-teacher nga si Dalisay.
Sa exclusive interview sang Bombo Radyo kay alyas Biloy, 16 anyos sang Brgy. Tambal, Janiuay, Iloilo, kag pahinante sang Elf truck, iya ginpahayag nga ang motorsiklo ang padulong sa syudad sang Iloilo samtang ang Ceres Liner kag ang ila ginasakyan nga Elf Truck ang nagapadulong sa banwa sang Dumangas, Iloilo.
Ginpahayag dugang ni alyas Biloy nga nagasunod ang Elf truck sa Ceres Liner sang ila nasugata ang motorsiklo.
Nasagairan sang Ceres Liner ang motorsiklo bag-o nagbunggo sa Elf truck.
Nakita pa ni alyas Biloy nga nagtabog ang angkas sa motorsiklo samtang nagbunggo naman sa Elf truck ang driver sang motorsiklo.
Ginapahayag nga ang driver lang sang motorsiklo ang nakasuksok sang helmet.
Nagupi naman ang panguna nga bahin sang Elf truck sa diin naipit ang tiil sang driver nga si Pablo Lacerna.