TIGBAUAN – Patay ang duha ka menor de edad sa duha ka ginapahayag separado nga suicide incidents nga nagluntad sa banwa sang Tigbauan subong nga adlaw, Hunyo 9.
Sa exclusive interview sang Bombo Radyo kay Police Major Rolando Araño, hepe sang Tigbauan Municipal Police Station, iya ginpahayag nga lunsay babayi ang mga biktima.
Ang una nga insidente ang natabo sa Brgy. Supa sa diin nasapwan nga nagabitay sa balayan ang 16-anyos nga biktima.
Suno kay Araño, wala sang kaupod sa balay ang biktima sang ginkomiter ang amo nga akto.
May yara sang sulat nga nakit-an sa lugar apang ginahibalo pa sang kapulisan kun lehitimo ini nga ginapanag-iyahan sang ginatumod nga biktima.
Makaligad ang pila lamang ka ginutlo, natabo ang ikaduha nga insidente sa Brgy 8 Poblacion sa diin nasapwan man nga nagabitay ang biktima gamit ang lubid nga abaca.
Ginapahayag nga antes ang insidente, nakitaan na sang sintomas sang depression ang ikaduha nga biktima bangud masami ini nga nagapamilin-bilin santo man sa iya mga Facebook posts.
Gin-athag ni Araño nga subong, “subject for investigation” pa ang amo nga mga insidente kag padayon pa nga ginahibalo sang mga otoridad kun bala paghikog ang natabo ukon may yara sang foul play.
‘PLEASE SEEK HELP’
Mensahe naman ni Araño sa mga pumuluyo partikular na sa kabataan, indi dapat pag-solohon ang problema kag sa baylo, ipakigbahin ini sa suod nga abyan ukon miyembro sang pamilya agud makabaton man sang bulig kag mahatagan sang solusyon.
Mas maayo gid suno sa natungdan kun iga-ampo sa Ginuo ang mga palas-anon sa kabuhi.
Para naman sa mga ginikanan, ang kaangay nga mga insidente suno kay Araño ang isa ka ‘eye opener’. Bilang panugyan, dapat nga i-monitor gid suno sa iya ang hulag sang mga kabataan agud mamutikan sa gilayon kun may yara sang gina-eksperyensya nga kabudlayan.
#
