ILOILO CITY – Nalakip ang duha ka mga aktibo nga pulis sang Iloilo City Police Office sa mga ginpasakaan sang kaso sang Leganes Municipal Police Station nga nagtiro kag naghal-id kay Glen Paloma sa Barangay Calaboa, Leganes, Iloilo.
Magluwas sa duha ka mga pulis, ginpasakaan man sang kaso ang tag-iya kag security guard sang Abe’s Payag Seafood Restaurant sa Barangay Pandac, Pavia kag duha ka mga John Does.
Ang ginpasaka nga kaso amo ang frustrated murder kag paglapas sa Section 29 sang Republic Act 9165 ukon Comprehensive Dangerous Drugs Act of 2002 bangud sang gintanum nga iligal nga droga sa biktima.
Sa interview sang Bombo Radyo kay Police Colonel Ronaldo Palomo, director sang Iloilo Police Provincial Office, iya ginpahayag nga positibo nga gintudlo sang biktima ang duha ka aktibo nga pulis nga amo ang naghulog sa iya nagikan sa salakyan kag nagtiro.
Base sa pahayag sang biktima, nag-chill ride siya nagikan sa iya puluy-an sa Barangay Zamora, City Proper kag nagub-an sang bisekleta sa atubang sang restaurant kag nasal-an nga kawatan sang security guard.
Gindakup siya sang guard kag gintawgan ang tag-iya sang restaurant.
Sang nag-abot ang tag-iya sang kalan-an upod ang mga bodyguard sini, nagpangayo sang pasaylo si Paloma apang ginsapote ini.
May gintawgan pa ang tag-iya sang kalan-an nga duha ka lalaki kag nag-abot sakay sa ila motorsiklo.
Ang mga ini amo ang gin-identify sang biktima nga duha ka mga pulis nagikan sa Iloilo City Police Office.
Nagtinguha pa nga magpalagyo ang biktima apang liwat ini nga ginsapote.
Ang pahayag sang mga suspek amo nga dal-on ang biktima sa presinto apang sa baylo, gindala ini sa banwa sang Leganes, ginhal-id kag gintiro.
Ang duha ka mga John Does naman suno sa pahayag sang biktima ang nagbulig man sapote sa iya.
Suno kay Palomo, ang pangalan sang biktima ang nagagwa sa isa ka pending investigation sa isa ka theft case.
Magluwas sini, si Paloma ang may kaso man nga paglapas sa RA 9165 kag nakagwa bangud sa plea bargaining agreement.
Gintugyan na sang Iloilo Police Provincial Office sa Police Regional Office VI ang pag-disclose sa pangalan sang duha ka mga pulis.
Kung matandaan, si Paloma ang nasapwan sa talamnan, nakagapos sang wire ang tiil kag kamot kag may pilas tuga sang pagkatiro kag may na-recover nga iligal nga droga.
