ILOILO CITY – Ginkumpirma sang Ad Hoc Committee nga may yara sang duha ka board of directors sang Iloilo City Government Employees Cooperative nga may plano nga magpalagyo sa luwas sang pungsod.
Sa interview sang Bombo Radyo kay Atty. Joseph Edward Areño, myembro sang gintukod nga Ad Hoc Committee, iya ginpahayag nga ang isa sa duha ka mga board of directors nga nagaplano nga magpalagyo ang una na nga naghalin sa Canada.
Suno kay Areño, sa tion nga mapasaka na ang kaso, maga-secure sila sang hold departure order agud nga indi na makagwa pa ang mga ini.
Sa pagpasaka naman sang kaso, ginpahayag ni Areño nga nakahanda na ang mga dokumento nga kinahanglanon.
Ginahulat nalang suno sa iya ang pagtipon sang collection.
Dugang pa sang natungdan, lakip sa mga dokumento nga ginhanda sang committee amo ang cheke nga naka-issue sa pangalan sang pila sa mga board of directors, mga cheke nga gin-tamper, kag mga loan application kag promisory note.
Ginkumpirma man ni Areño nga may yara sang myembro sang kooperatiba nga desidido nga magpasaka sang kaso batuk sa mga board of directors.
