𝗜𝗟𝗢𝗜𝗟𝗢 𝗖𝗜𝗧𝗬 — Balik sa prisohan ang duha ka mga hangkilan nga kawatan matapos nga nakuhaan sang masobra P100,000 nga balor sang suspected shabu sa Brgy. Hipodromo, Iloilo City Proper.
Ang mga suspek amo sandat Eric Espago aka ”Kamatayan”, single, 44, isa ka street sweeper kag residente sang nasambit nga barangay; kag si Ryan Dequiña aka “Nolnol”,Tokhang Surenderee, single, 38, isa ka laborer, kag residente sang Brgy. Rizal Lapuz, Iloilo City.
Sa interview sang Bombo Radyo kay Police Captain Roque Gemino III, Chief of Police sang Iloilo City Police Station 1, iya ginpahayag nga isa ka semana nga gin-monitor sang otoridad ang duha ka subject antes nga natigayon nga nadakpan.
Suno kay Gimeno, tuig 2005 sang napreso si alyas Kamatayan bangud sa kaso nga pagpanakaw, apang nakaguwa sang tuig 2008 kag liwat nga napreso sang 2013 bangud man sa kapareho nga kaso kag liwat nga nakaguwa sang 2022.
Ginpahayag man sini nga anay man nga napreso si Alyas Nolnol bangud man sa pagpangawat sang 2008 apang nakaguwa matapos ang anom ka bulan.
Nakuha sa mga subject ang 20 grams nga iligal nga druga nga standard drug price nga P138,000.
Nagapangatubang ang mga suspetsado sa paglapas sa kaso nga RA 9165 ukon Comprehensive Dangerous Drugs Act of 2002.
