ILOILO CITY – Natalana nga pasakaan sang kaso ang duha ka mga indibidwal nga nadakpan nga iligal nga nagpangisda sa Sitio Baliguian, Barangay Malangabang, Concepcion, Iloilo.
Ang mga arestado amo sanday Loedgie Tupaz, 43, kag ang crew sini nga si Andro Ontal, 30, lunsay mga residente sang Barangay Longuingot, Estancia, Iloilo.
Nakuha sa ila ang sakayan nga gingamit sa pagpangisda kag mga fishing materials kag halos 30 kilos nga isda nga nagabalor sang P4, 500.
Sa interview sang Bombo Radyo kay Police Major Samuel Vipinosa, hepe sang Concepcion Municipal Police Station, iya ginpahayag nga nagagamit sang trawl kag manipis nga lambat ang mga ini nga nagaresulta sa pagkaguba sang mga corals kag pagkahulik sang mga isda nga indi pwede makuha.
Suno kay Vipinosa, indi ini ang una nga tion nga nadakpan ang duha bangud suno sa ila, wala sila sang nahibaluan nga iban nga trabaho magluwas lamang sa pagpangisda.
Apang suno sa hepe, nagagamit sila sa gihapon sang iligal nga pamaagi.
