ILOILO CITY – Gina-imbestigaran na sang Iloilo City Public Safety and Transportation Management Office ang duha sini ka mga job hires bangud sa gina-alegar pagprenda sang ginrentahan nga salakyan.
Sa interview sang Bombo Radyo kay Mr. Jeck Conlu, pinuno sang talatapan, iya ginpahayag nga nagpadulong sa ila opisina ang duha ka mga indibidwal agud nga magreklamo.
Suno kay Conlu, nagrenta ang mga ini sang salakyan apang makapila ka beses nga gina-extend bangud nga kinahanglanon pa.
Nagduda na ang isa sa mga ginrentahan sang salakyan bangud nga wala na nagasanto ang pahayag sang duha sa nahamtangan sang salakyan base sa location tracker.
Didto kag nahibaluan nga ginprenda sang mga ini ang salakyan.
Sa isa ka salakyan, natabo ang transaction sa distrito sang Molo kag ginprenda sa banwa sang Pavia.
Ang isa naman ang gin-rentahan sa distrito sang Jaro kag ginprenda sa Bo. Obrero, Lapuz.
Pahayag ni Conlu, wala sang labot ang opisina kag personal nga buluhaton ini sang duha ka mga job hires apang ini ang wala ginatolerar sang syudad sa mga empleyado sini.
Makabig nga grave misconduct ang ginhimo sang duha dugangan pa nga naghimu-himo sila sang OR-CR nga amo ang ginpakita sa ginprendahan.
Gingamit man sang mga ini suno kay Conlu ang pangalan sang opisina sang ginpakita nila ang ila nga identification cards.
Nagpanawagan man si Conlu sa iban pa nga posible biktima sang duha ka mga job hires nga magpadulong lang sa ila opisina.
