Dakop ang duha ka mga lalaki matapos nga nagtuyo nga kawaton ang copper wire sang isa ka telecommunication company sa corner Delgado-Mabini Street, Iloilo City Proper.
Sa interview sang Bombo Radyo kay Police Captain Joebert Amado, hepe sang Iloilo City Police Station 7, iya ginpahayag nga nakit-an sang guwardya sang isa ka establisyemento ang mga suspetsado nga ginbuksan ang manhole sang telecommunications company kag may yara sang ginahunos halin sa manhole.
Suno kay Amado, samtang may nagahunos sang mga kable sang telecommunication company, may yara man sang lalaki nga nagatulod sa truck.
Gintul-id man sini nga sang nagresponde ang kapulisan, gilayon nga nagpalagyo ang mga suspek, rason nga duha lang sa ila ang natigayon nga maaresto.
Gin-athag man sang hepe nga posible nga isa lang ka grupo ang nadakpan nga mga suspek nga nagpangawat man sang kable sang telecommunications company sang nagligad nga bulan sa amo nga lugar bangud lunsay taga-Capiz ang mga ini.
Ginpanginwala naman sang duha ka mga nadakpan nga sila ang may kahilabtanan sa amo nga pagpangawat.
Posible naman nga magapangatubang sang kaso nga paglapas sa RA 10951 ukon malicious mischief ang mga suspetsado.
