ILOILO CITY – Gin-file na ang kaso nga Murder kag Theft sa duha ka mga pulis kag duha ka mga wala makilal-an pa nga suspek bangud sa pag-patay kay Delfin Britanico, anak sang anay mamalidha nga si Salvador Britanico.

Suno kay National Bureau of Investigation Officer-In-Charge (OIC) Eric Distor, napasaka na ang nasambit nga mga kaso sanday PCpl. Jerry Carmelotes Villanueva kag PCpl. Joseph Andrew Poneles Joven kag sa duha ka mga wala pa makilal-an nga suspek sa pagkapatay ni Delfin Britanico nga nakaangkon sang walo ka igo sang bala sa iya nga ulo kag sa nagkalain-lain nga bahin sang lawas.

Nahibaluan nga sa Enero 19, 2020, 12:10 sang udto, naghalin si Britanico sa iya nga balay sa Prime Estate Subdivision bangud mapadulong ini kuntani sa iya condominium unit sa San Rafael, Mandurriao, Iloilo City sakay sa iya nga BMW nga motorsiklo.

Sang 12:17 sang udto, nagtawag pa si Britanico sa iya nga asawa kag nagpanugid nga may mga lalaki nga nagasunod sa iya.

Apang na utod ang tawag sang biktima kag sang nagtawag ang asawa sini, indi na ma contact ang numero ni Britanico.

Nakabati sang apat ka lupok ang gwardya sang Prime Subdivision kag sang ginkadto-an sini sa taytay upod ang asawa sang biktima, nakit-an nila si Britanico nga madamo sang dugo.

Gindala pa sa hospital ang biktima apang gindeklara nga dead on arrival.

Base man sa imbestigasyon sang NBI, ang mga suspek amo man ang ginalantaw nga yara sa likod sang kamatayon ni Allain Muller nga ginpatay man antes kay Britanico.

Sa panaysayon sang mga testigo nga nakakita sa pagluthang-patay kay Muller, ila nakita ang duag gray nga Adventure nga amo ang gingamit sang mga suspek.

Na trace man sang otoridad kun kay sin-o ang gray Adventure nga may plate number nga ABQ7754 kag sang ginpadulongan ang Car Rental, nagdepensa ang tag-iya nga wala na sa ila ang nasambit nga salakyan umpisa sang Enero 2020.

Sa CCTV footage sa pagkapatay ni Muller, nakit-an nga may apat ka mga indibidwal sa sulod sang Mitsubishi Adventure.

Samtang sa natabo naman kay Britanico, ginpahayag sang testigo nga may nakit-an ini nga duha ka mga lalaki nga nagatindog malapit sa Adventure samtang ginatiro ang biktima.

Base naman sa tag-iya sang Car Rental, gin-arkilahan ni PCpl. Joseph Andrew Poneles Joven ang Adventure sang duha ka adlaw ukon tubtob sang Enero 20, 2020.

Pagka-bwas, nakibot ang tag-iya sang car rental nga naghingyo si PCpl. Joseph Andrew Poneles Joven nga makig-kita sa iya kag nag-ako ini nga ang gin-arkilahan niya nga Adventure ang gin-gamit sini nga mangin get-away vehicle sa pagpatay kay Muller kag Britanico.

Gin-ako man ni PCpl. Joseph Andrew Poneles Joven nga siya ang nagserbe nga driver sang grupo.

Matapos ginpatay si Muller, nag-untat pa ang grupo nanday PCpl. Joseph Andrew Poneles Joven sa bakante nga duta sa Nabitasan, La Paz agud nga kakson ang puti nga stickers sa Adventure.

Apang nakita sila ni Britanico kag may yara sang kumprontahanay nga natabo.

Gin-istorya man ni PCpl. Joseph Andrew Poneles Joven ang tag-iya sang car rental nga patyon si Osting Del Pilar, isa ka drug related target sang grupo sa tion nga may patigayunon nga imbestigasyon tuhoy sa kamatayon ni Muller kag ni Britanico.

Samtang, positibo nga nakilala naman sang isa ka testigo si PCpl. Jerry Carmelotes Villanueva nga amo naman ang nagkuha sang cellphone ni Britanico.

Pahayag sang asawa ni Britanico, akig ini sa mga nagalapas sang layi sa trapiko kag masami pa niya ini ginakuhaan sang litrato agud ma post sa social media.

Mahimo nga nagdumdom ang mga suspek nga i-report ni Britanico sa otoridad ang ila aktibidad sang nagtawag ini.

Ginakabig naman ini nga “welcome milestone” sang pamilya Britanico nga natumod na ang mga suspek sa krimen.