Iloilo City – Nakapangayo na sang pasaylo ang duha ka mga police majors sang Iloilo City Police Office kay Iloilo City Mayor Jerry Treñas kasunod sang ginapahayag nga pag-walk out sang alkalde sa command conference bangud nga naga-text ang mga ini.
Matandaan nga gintawag nga bastos sang alkalde ang duha ka mga opisyal sang pulis.
Sa interview sang Bombo Radyo kay Police Major Shella Mae Sangrines, spokesperson sang Iloilo City Police Station, iya ginpahayag nga nahitso na ang problema sa tunga sang alkalde kag sang duha ka mga police majors.
Gin-athag ni Sangrines nga indi walk-out ang natabo bangud manugtapos naman ang meeting sa alkalde.
Sa pagkamatuod suno kay Sangrines, gin-reject lamang sang duha ka mga opisyal ang tawag sa ila cellphone.
Samtang, agud nga malikawan ang kaangay nga hitabo, nagpatawag sang pagsinapol si Police Colonel Joeresty Coronica, director sang Iloilo City Police Office, agud abisuhan ang tanan nga police personnel sang mga pagsulundan kaangay sang pag-obserba sang proper decorum sa tanan nga tion.
Nagapasalamat naman ang Iloilo City Police Office sa nangin paghangop sang alkalde.
