ILOILO CITY – Gin-relieve na sa pwesto ang duha ka mga pulis sa Iloilo City Police Office nga ginatudlo lakip sa mga suspek sa pagtiro sa isa ka ex-convict kag paghal-id sa Barangay Calaboa, Leganes, Iloilo.
Ang duha ka pulis amo sanday Police Executive Master Sergeant Jessie Jim Rubio kag Police Staff Sergeant Enrico Carlito Gonzales, madugay na nga myembro sang tracker team sang wanted persons sa Iloilo City Police Office- Intelligence Unit.
Ang biktima naman amo si Glen Paloma, residente sang Barangay Zamora-Melleza, Iloilo City Proper.
Sa interview sang Bombo Radyo kay Police Brigadier General Leo Francisco, director ng Police Regional Office VI, iya ginpahayag nga ginmanduan na niya ang Regional Investigation And Detective Management Division nga magpatigayon sang administrative investigation sa duha ka mga pulis.
Agud nga indi maapektuhan ang imbestigasyon, ginpakama-ayo sang director nga i-relieve ang mga ini sa pwesto.
Nagpasalig naman ang director nga sa tion nga mapatud-an nga guilty ang duha, magapangatubang sila sang nagaka-igo nga kaso kag penalidad.
Sa pihak sang involvement sang duha ka mga pulis, ginklaro sang director nga wala sang lugar sa Philippine National Police ang kaangay nga buluhaton.
Kung balik-balikan, nakasalbar ang biktima nga si Paloma kag positibo nga gintudlo ang duha ka mga pulis nga amo ang naghal-id kag nagtiro sa iya banwa sang Leganes.
Sang nagligad nga adlaw, napasaka na ang kaso nga frustrated murder kag paglapas sa Section 29 sang Republic Act 9165 ukon Comprehensive Dangerous Drugs Act of 2002 batuk sa duha ka mga pulis, sa tag-iya sang kalan-an nga si Leda, ang security guard nga si Ricky Giluani, 28, residente sang San Remegio, Antique, kag duha pa ka mga John Does.
Bukas naman ang linya sang Bombo Radyo Iloilo para sa sabat sang mga ginpasakaan sang kaso.
‘Ginpanginwala ang involvement’
Ginpanginwala sang duha ka mga pulis sa Iloilo City Police Office nga may kahilabtanan sila sa tuyo nga pagpatay sa isa ka ex-convict nga ginhal-id sa isa ka talamnan sa Barangay Calaboa, Leganes, Iloilo sang Marso 2023.
Sa interview sang Bombo Radyo kay Police Colonel Joeresty Coronica, director sang Iloilo City Police Office, iya ginpahayag nga nagpaathag ang duha ka mga pulis nga wala sila sang involvement sa krimen kag posible nga nagtimalos lang ang biktima.
Suno sa pahayag ni Rubio, isa siya sa mga nagdakop kay Paloma sang una bangud sa kaso nga theft.
Dugang pa ni Coronica, indi man kilala sang duha ka mga pulis ang tag-iya sang Abe’s Payag Seafood Restaurant sa Barangay Pandac, Pavia nga si John Ian Leda sang Arevalo, Iloilo City.
Ginpahayag dugang sang natungdan nga alegasyon pa lamang ini sang biktima kag wala pa napamatud-an nga guilty.
