ILOILO CITY – Atubangon sang duha ka mga punong barangay ang mga kaso nga mahimo ipasaka sa ila ni outgoing Iloilo City Mayor Jose Espinosa III may kaangtanan sa gina-alegar pagpangilkil sa Iloilo Terminal Market.
Ang mga punong barangay amo sanday Noel Soliman sang Rizal Pala-Pala 2, Iloilo City kag Alain Rey Depatillo sang Rizal Pala Pala Zone 1.
Sa interview sang Bombo Radyo kay Punong Barangay Soliman, iya ginpahayag nga wala siya mahadlok kun pasakaan siya sang kaso bangud nga wala man siya sang sala.
Suno kay Soliman, nakahibalo ang mga vendor sa super nga wala siya nagapangilkil.
Nagapati man ang punong barangay nga may yara sang tawo sa likod sang pagtudlo sa ila ni Depatillo nga nagapangilkil apisar nga wala ini sang kamatuoran.
Dugang pa sang natungdan, ang tawo nga utok sa pagpasibangod sa ila amo ang nagasutsot kay Mayor Espinosa.
