Nagkarab-karab ang duha ka daku nga oil tankers matapos nga nagbungguanay malapit sa Singapore — ang pinakadaku nga oil trading hub sa Asya kag pinakadaku man nga bunkering port sa kalibutan.
Suno sa otoridad kag isa sa mga tag-iya sang tankers, gin-airlift lang agud madala sa ospital ang duha ka crew members samtang na-rescue naman ang iban sa ila kaupdanan.
Sandig sa dugang nga impormasyon halin sa Maritime and Port Authority of Singapore (MPA), involved sa ini nga insidente ang Singapore-flagged tanker nga Hafnia Nile kag ang Sao Tome and Principe-flagged tanker nga Ceres I. Ginabanta nga yara na ang mga ini sa 55 km (34 miles) naamin-nasidlangan sang isla nga Pedra Branca sang natabo ang pagbungguanay.
Hilway na sa katalagman ang 22 ka crew members sang Hafnia Nile amo man ang 40 nga yara sa Ceres I.
Kasunod sini, nag-anunsyo man ang environmental authorities sa Malaysia nga gin-abisuhan na sila nga magpreparar sa posible magluntad nga pagtagas sang langis ukon oil spill.
Ginapahayag nga ang tanker nga si Hafnia Nile ang nagakarga sang 300,000 barrels sang naphtha, samtang ang Ceres I ang gina-alegar may karga nga 2 million barrels sang Iranian crude.
