ILOILO CITY – Madugay na nga naka-‘floating status’ sanday Police Staff Sergeant Ricardo Cabrera Morante kag Police Master Sergeant Vernie Lui Escorial, duha ka mga pulis nga ginatudlo nga nagpangamot sa pagpatay sa negosyante nga si Delfin Britanico sang Enero 19,2020 sa Iloilo River Boulevard sa Barangay Nabitasan, La Paz, Iloilo City.
Sa interview sang Bombo Radyo kay Police Major Marlyn Roquero, spokesperson sang Iloilo City Police Office, iya ginpahayag nga mandu ni Iloilo City Police Office director Pol. Col. Eric Dampal nga i-assign ang duha ka nasambit nga pulis sa City Police Personnel Holding and Accounting Unit.
Suno kay Roquero, nagareport gihapon sila sa ICPO bangud nagabantay sila sa gate.
Antes sang ila nga assignment sa City Personnel Holding and Accounting Unit, assigned sanday Morante kag Escorial sa City Drug Enforcement Unit.
Suno kay Roquero, ginkakas sila sa City Drug Enforcement Unit sang naangot ang ila pangalan sa alegasyon sa likod sang kamatayon ni Britanico.
Magluwas sa pag-angot sang ila pangalan sa amo nga kaso, wala na sang pending criminal case sanday Morante kag Escorial.
Nahibaluan nga ang state witness nga si PCpl. Joseph Andrew Poneles Joven ang nagtuad sa iya nga sworn statement nga si Morante ang una nga nagluthang kay Britanico kag si Escorial ang nag-‘finishing’.
Base naman sa nauna nga imbestigasyon sang National Bureau of Investigation, ang mga suspek amo man ang ginalantaw nga yara sa likod sang kamatayon ni Allen Muller nga ginpatay man antes kay Delfin sa Jaro sa ginbansagan twin shooting incident sang amo nga adlaw.
