Nagbunggoanay ang duha ka salakyan nga pareho nga nagtambong sa isa ka lubong sa sulod mismo sang Forest Lake Cemetery sa Brgy. Calajunan, Mandurriao, Iloilo City, pasado alas-5:50 kaina sang hapon, Hulyo 30.
Sa interview sang Bombo Radyo kay Police Chief Master Sergeant Alfredo Masamong Jr., traffic investigator sang Traffic Enforcement Unit sang Mandurriao, iya ginpahayag nga ang insidente natabo sang aksidente nga natapakan sang driver sang SUV nga ginkilala nga si Alyas Jerry, 77-anyos, ang accelerator sang iya salakyan imbes nga preno kag nagdiretso ini nga nagbunggo sa nagapadulong nga L300 FB Van sang barangay responder sang Barangay West Habog-Habog, Molo nga ginamaneho naman ni Alyas Dionisio, 65 anyos.
Tungod sang impact sang salakyan, may mga nag-angkon sang minor injuries, lakip na ang 10 ka pasahero sang van.
May mga tawo man nga yara sa palibot sang dalan nga naigo kag nakaangkon sang gamay nga samad.
Ang mga biktima nga may minor injuries gilayon man nga gindala sa malapit nga ospital para sa medical attention.
Ang driver sang Fortuner nga si Alyas Jerry gin paidalum sa hospital arrest kag ginabantayan sang kapulisan samtang ginabulong sa Western Visayas Medical Center.
By: 𝑩𝒐𝒎𝒃𝒐 𝑲𝒓𝒚𝒍𝒍𝒆 𝑴𝒆𝒍𝒍𝒊𝒛𝒂
