BUENAVISTA, GUIMARAS – Siraduhon buwas nga adlaw, Agosto 7, ang duha ka talatapan sa munisipyo sang Buenavista, Guimaras agud hatagan sang ligwa ang disinfection.
Sa interview sang Bombo Radyo kay Mayor Eugene Reyes, iya ginpahayag nga sang nagligad nga Agosto 3, nakapadulong sa munisipyo ang mga empleyado sang AC Energy may kaangtanan sa natabo nga oil spill.
Suno kay Reyes, pila lamang ka minutos ang iya exposure sa isa ka empleyado sang AC Energy nga ulihi na lang nakumpirma nga nagpositibo sa virus.
Magluwas sa iya suno kay Reyes, may yara man sang exposure sa COVID-19 positive ang isa ka department head sang Local Government Unit sang Buenavista.
Gin-athag ni Reyes nga lain man ang COVID-19 positive nga empleyado sang AC Energy nga naka-close contact kay Iloilo City Mayor Jerry Treñas.
Bangud sini, magapaidalom sa quarantine kag sa COVID-19 test ang alkalde lakip na ang isa ka department head samtang padayon naman ang contact tracing.
