Nagahingyo ang mga pulis sa Florida, USA sang bulig sang publiko agud matumod na kag madakpan kun sin-o ang nagpinalupok sang pusil sa isa ka club nga amo ang nangin rason sang kamatayon sang duha ka tawo kag nagpilas sa masobra 20 ka iban pa.
Suno kay Miami-Dade police director Alfredo Ramirez III, santo sa ila inisyal nga imbestigasyon, may isa ka puti nga sports utlity vehicle (SUV) nga nagpundo sa gwa sang El Mula Banquet Hall sa Northwest Miami-Dade kag naggwa ang tatlo ka lalaki nga may rifles kag handguns kag nagpaniro sa mga tawo nga yara sa lugar.
Dead on the spot ang duha ka tawo samtang ginhingagaw naman dala sa lain-lain nga ospital ang ginabanta 20-25 ka tawo kun sa diin isa subong ang ginapahayag yara sa kritikal nga kondisyon.
Ginrentahan lang ang banquet hall kag billiards club para sa isa ka concert sang natabo ang amo nga insidente. Padayon pa subong ang imbestigasyon sa natabo nga amo ang ginapahayag sang otoridad nga isa sa pinakadaku nga mass shootings sa Florida subong nga mga tinuig. — Reuters
