OTON, ILOILO – Wala sa gihapon sang may nasabat sa mga palamangkutanon sang mga taga-Barangay Botong, Oton, Iloilo may kaangtanan sa duha ka unidentified senior citizens nga nasapwan sa sulod sang isa ka balay sa ila nga lugar.
Sa interview sang Bombo Radyo kay Punong Barangay Rehum Torre, iya ginpahayag nga wala gid gihapon sang bisan isa sa mga pumuluyo nga nakapanugid nga may nakit-an sila nga duha ka tigulang nga nagaistar sa amo nga balay antes natabo ang krimen sang Disyembre 26.
Ang balay ang madugay na nga ginapaarkilahan apang ang matuod nga tag-iya ang yara na subong naga-istar sa separado nga balay sa isa ka subdivision sa amo man nga banwa.
Suno kay Torre, antes ang insidente, may ara pa sang isa ka kumpaniya nga nag-arkila sa amo nga balay apang nagtapos na sang ila nga renta sang Setyembre.
Sang Oktubre tubtob Nobyembre, nag-umpisa na ang kwestyonable nga mga identity sang nag-arkila sa amo nga balay.
May nag-transact kag nagbayad sang one-month deposit kag one-month advance nga renta; apang wala sang may nakit-an nga nag-istar.
Suno kay Torre, santo sa alegasyon sang pulis, “Ryan Luna” ang pangalan sang nag-arkila sa balay apang indi na ma-contact sa subong.
Magluwas diri, may isa man ka tawo nga naga-deliver sang tubig nga nagpahayag nga may yara siya sang lalaki nga gindul-ungan sang tubig sa amo nga balay sang bulan sang Nobyembre, apang wala man niya nakuhaan sang contact number.
11:30 sang gab-i antes nasapwan ang duha ka bangkay, may nakit-an pa nga isa ka puti nga van kag isa ka motorsiklo nga naggwa sa amo nga balay.
Wala sang komosyon, wala sang ilinaway nga nabatian antes nasapwan ang duha.
Matandaan nga una na nagpahayag ang Iloilo Police Provincial Office nga wala nila ginadula ang posibilidad nga mga myembro sang NPA ang duha ka biktima (santo man sa recoveries nga nakit-an sa crime scene: flag nga ginapatihan iya sang CPP-NPA, .45 caliber pistol, kag walo ka IDs nga may duha ka pangalan – ANTONIO CABANATAN kag PASTOR MACATIMBAG).
Ginasundan man ang anggulo sang Robbery with Homicide kag Homicide ukon Murder.
