Wala gin-abisohan ukon wala gin-pati?
Ini ang duha ka mga palamangkutanon nga luyag mabal-an ni Iloilo Gov. Arthur Defensor Jr. ang sabat may kaangtanan sa pila ka mga call center agents sa syudad sang Iloilo nga nakapauli pa sa pila ka mga kabanwahanan sa probinsya apisar nga napa-idalom na sa reverse transcription polymerase chain reaction (RT-PCR) test.
Sa interview sang Bombo Radyo kay Gov. Defensor, iya ginpahayag nga padayon ang contact tracing nga ginapatigayon sa probinsya agud mahibaluan kun bala may yara pa sang call center agents nga nakapauli sa banwa.
Nakahibalo naman ang publiko suno sa gobernador nga kun ginkuhaan sang swab sample para sa COVID-19 testing, dapat nga magpahimuyong na lang ini.
Nagpangabay ang gobernador sa mga employer nga hatagan sang husto nga abiso ang mga employees, preparahan ang pag-quarantine kag makig-angot man sa mga local government units.
