ILOILO CITY–Ginsalakay sang ginaalegar Roll On-Roll Off (RORO) vessel nga gikan sa Bacolod City padulong sa Iloilo ang isa ka sakayang pandagat sa diin duha ang misisng.
Sa interview sang Bombo Radyo kay Lt. Commander Ramil Palabrica, taghambal sang Philippine Coastguard Western Visayas, iya ginpahayag nga tatlo ang sakay sang pumpboat apang isa lang ang nakaluwas nga ginkilala nga si Erwin Mansueto, 54 anyos sang Purok Masipag, Punta Taytay, Bacolod City kag missing naman ang duha nga sanday Lupin Despojo, 40 anyos, kag pakaisa nga si alyas Sito, 30 anyos, lunsay sang nasambit nga lugar.
Suno kay Palabrica, natabo ang insidente las-11 kagab-i sa Iguana Bank nga sakop sa isla sang Gumaras.
Magapangisda kun tani ang tatlo sang nasalakay ang ila nga pumpboat sang Roro vessel.
Nakit-an lamang sang barko nga Montenegro si Mansueto ala una na sang kaagahon nga nagalangoy.
Padayon naman ang search and rescue operations sang Philippine Coastguard agud makit-an ang duha pa ka missing nga upod ni Mansueto sa sakayang pandagat.