Nadakpan na sang Criminal Investigation and Detection Group (CIDG) sang Philippine National Police (PNP) ang duha pa ka suspek sa kaso sang pagpangidnap kag pagpatay sa Chinese nga negosyante nga si Anson Que kag iya driver nga si Armanie Pabillo.
Ginkumpirmar sang PNP nga isa sa mga nadakpan amo ang ginatudlo nga nagapanguna nga suspek nga si Gong Wen Li, kilala man sa alyas nga Kelly Tan.
Una na nga ginhingadlan sang PNP ang iban pa nga suspek nga sanday David Tan Liao, Richardo Austria, Reymart Catequista, kag Jonin Lin.
Base sa imbistigayson, isa sa mga ginatudlo nga mastermind sa krimen amo ang kakilala man mismo ni Anson Que.
Suno sa kapulisan, may dako nga papel si Kelly Tan sa pagpangidnap kay Que.
Ginpahayag nga siya ang nagdala kay Que sa lugar nga gin-ambush kag amo man ang naggamit sang cellphone ni Que agud makig-negosasyon sa pamilya sang biktima samtang ginakidnap.
Madumduman nga sang Abril sini nga tuig napasaka sang PNP ang kaso nga Anti-Kidnapping Group (AKG) batuk sa tatlo pa ka suspek.
Duha ka Pilipino ang nadakpan sa follow-up operation sa Barangay IV, Roxas, Palawan, sang Abril 18.
Samtang, nagsurender naman ang ikatlo nga suspek nga Chinese national sa mga otoridad.
Nadiskubrehan sang imbestigasyon nga ang nasambit nga Chinese national may una na nga kaso sang pagpangidnap sa Angeles City sang Nobyembre 2009, kag may koneksyon man sa lima pa ka kaso sang pagpangidnap sa Metro Manila sang 2022 kag 2024.
Ginpahayag nga nadula si Que kag ang iya driver sang Marso 29 sa diin nagpangayo sang ransom ang mga kidnappers nga naglab-ut sa $20 million, kag ginbaydan sang pamilya ang kapin P200 million paagi sa cryptocurrency.
Matandaan nga sang Abril 9, nakita na lang nga patay si Que kag si Pabillo sa Rodriguez, Rizal.
