Patay ang driver kag backrider sang motorsiklo matapos nga nagbunggo ini sa isa ka elf truck sa Sitio Kalawidan, Brgy. Igcocolo, Guimbal, Iloilo.
Ang mga biktima amo ang driver nga si Joseph Anthony Alexander ,18 , Grade -12 student, residente sang Nahapay, Guimbal, Iloilo kag angkas nga si Kyle Dela Piedra, 18, senior high school student, residente sang Tagpuan, Tubungan, Iloilo.
Ang driver naman sang truck amo si Rogelio Garganza Jr., 51, residente sang Brgy. Igcocolo, Guimbal, Iloilo.
Sa interview sang Bombo Radyo kay Police Corporal Tommy Macalalag, imbestigador sang Guimbal Municipal Police Station, iya ginpahayag nga naghana pa kuntani nga mag u-turn ang truck apang hinali lang nga nag-overtake ang nagasunod nga motorsiklo kag nagbunggo sa truck.
Suno kay Macalalag, bangod sa impact sang pagkabunggo, nagtabog pa ang mga biktima kag naglampos sa gutter rason sang ila naangkon nga mga head injuries nga gintunaan sang ila kamatayon.
Ginpahayag sang pulis nga dead on arrival na ang biktima nga si Alexander sang gindala sa ospital kag gindeklara man nga ginbawian na sang kabuhi ang angkas nga si Piedra.
Yara naman sa kostudiya sang Guimbal PNP ang driver sang truck sa diin ginahulat nalang ang mangin desisyon sang pamilya sang mga biktima kun mapasaka sila kaso kun indi.
Samtang, santo naman sa witness sa aksidente nga nagluntad sa amo nga lugar, tuman kadasig ang nangin dalagan sang elf truck kag motorsiklo nga nagbungguanay rason nga tuman kabaskog ang nangin impact.
Sa interview sang Bombo Radyo kay Lorenzo Gomilla, iya ginpahayag nga nagpondo na ang duha ka motorsiklo sa likod sang elf truck sang nagsenyas ang driver nga maga-u-turn.
Apang bangud sa gilayon nga pag-overtake sang driver sang motorsiklo nga ginasakyan sang mga biktima didto na kag natabo ang aksidente.
Suno kay Gomilla, wala sang suksok nga helmet ang driver kag ang iya angkas rason nga dako ang nangin pilas nila sa ulo nga amo ang gintinaan sang ila kamatayon.
Ginpahayag ni Gomilla nga madamo na sang aksidente nga nagluntad sa amo nga lugar sa diin ginakabig nila ini nga accident prone area.
