MIAGAO, ILOILO– Duha ang pilason sa nagluntad nga pagpamuno kag pagpangluthang sa Brgy. Kirayan Norte, Miagao, Iloilo.
Ang mga nagtuga sang gamo amo sanday Romualdo Austria Jr., Romualdo Austria Sr., Romilio Austria, Harvy Solis kag Harry Solis.
Sa interview sang Bombo Radyo kay Police Lieutenant Lunelyn Talamillo, Deputy Chief of Police sang Miagao Municipal Police Station, iya ginpahayag nga naglabay si Romilio Solis sa lugar kun sa diin natabo ang insidente, ginkumpronta ni Harvy Solis kag ginpamangkot kun sin-o ang ginatumod niya sa ginapalapta nga malain nga istorya.
Didto na kag nagpalupok sang armas si Romualdo Austria Sr. kun sa diin naigo si Solis kag nakaangkon sang pilas sa natuo nga paa lakip na sa agtang nga tuga naman sang pagpanghaboy sang bato sang wala makilala nga suspek.
Ginbuno ni Harvy Solis si Romualdo Austria Jr. nga nakaangkon sang madalom nga pilas sa wala matumod nga bahin sang lawas.
Sa subong suno sa natungdan, preso sa Miagao Municipal Police Station ang tatlo apang natigayun naman nga nakaguwa sa presuhan si Harry Solis bangud nagtambag lang ini sa nagluntad nga kinagamo.
Ang isa naman sa mga naulamid sa kinagamo ang padayun nga ginabulong sa hospital.
Daan nga hiligut-anon kag away pinamilya ang rason kun nga-a nagluntad ang insidente.
