Nadakpan na ang duha sa pito ka mga suspek nga nagransak sang e-tap machine sa guwa sang The Atrium mall sa Iloilo City Proper.
Ini amo sanday alyas Jun-jun, residente sang Sagay, Negros Occidental; kag Serafio Camposano, residente sang Sta. Monica, Oton.
Nagapabilin naman nga at large ang mastermind sa pagpangransak nga si Ariston Solis, nga nagatrabaho man sa amo nga mall.
Sa interview sang Bombo Radyo kay Police Captain Roque Gimeno III, hepe sang Iloilo City Police Station 1, iya ginpahayag nga ‘inside job’ ang natabo nga pagpangransak bangud lunsay empleyado sang mall ang tatlo ka mga nasambit nga suspek.
Suno kay Gimeno, si Solis nga utok sa pagpangawat sang masobra P340,000, amo man ang nag-isip sang kwarta, antes ini nga natigayon ma-deposito sa bangko.
Ginbuyagyag man ni Gimeno nga nagserbi bilang driver sang awto nga salakyan agud nga sila makapalagyo, amo si alyas Jun-jun, kon sa diin, natigayon naman ini nga ma-intercept sa Jaro.
Ginasundan naman sang kapulisan ang apat pa ka mga wala makilalal-an nga indibdiwal nga may kaangtanan man sa pagpangawat.
Sa subong, nagapadayon ang back tracking sang mga kapulisan agud matul-id ang identity sang iban pa ka mga suspetsado.
