ILOILO CITY – Nagapadayon ang pagpangita sang dugang nga ebidensya sang Dumangas Municipal Police Station angut sa kamatayon sang founder sang Psi Sigma Phi Philippines Incorporated.
Ang biktima amo si Vivencio Bennedick Dequilla Jr., 63, nga nasapwan sa katubuhan sa Brgy. PD Monfort North, kag yara na sa advanced state of decomposition sang Marso 2021.
Sa interview sang Bombo Radyo kay PSSgt. Terrence John Soria, imbestigador sang amo nga kaso, iya ginpahayag nga padayon ang monitoring sang kapulisan sa mga persons of interest sa amo nga kaso.
Suno kay Soria, kulang pa ang ila ebidensya kag indi pa mabaskog kun ipresentar sa korte.
Sa subong, nagapadayon man ang pagpangita sang dugang nga witness sa amo nga kaso.
Nahibaluan nga nagtanyag sang Php 250,000 nga reward money ang pamilya sang biktima agud nga mapadasig ang pagsolbar sang kaso.
