ILOILO CITY- Ginkumpirma sang Dumangas Municipal Police Station nga nakapakig-angot sila sa National Telecommunications Commission agud makabulig sa imbestigasyon sa pagpatay sa founder sang Psi Sigma Phi Philippines Incorporated .
Ang biktima amo si Vivencio Bennedick Dequilla Jr., 63, nga nasapwan sa katubuhan sa Brgy. PD Monfort North, kag yara na sa advanced state of decomposition sang Marso 2021.
Sa interview sang Bombo Radyo kay PSSGT Terrence John Soria, chief investigator sang Dumangas PNP, iya ginpahayag nga sa pagpakigsugilanon niya sa NTC agud hingyuon nga ma-check sa mobile number sang nadula nga cellphone sang biktima kun sin-o ang mga ulihi niya nga naka-text ukon natawgan, ginsiling sang talatapan wala sila sang kapasidad nga himuon ini.
Nahibaluan nga nagtanyag sang Php 250,000 nga reward money ang pamilya sang biktima agud nga mapadasig ang pagsolbar sang kaso.
