Ginbaton ni Department of Health Secretary Francisco Duque III ang hangkat ni Senador Christopher ‘Bong’ Go nga una siya nga mapabakuna sang COVID-19 vaccine sa tion nga ini ang mangin available sa pungsod agud mapamatud-an nga safe ini para sa mga Pilipino.
Suno kay Duque, handa siya nga magpabakuna apang kinahanglan nga natumod na sang Vaccine Expert Panel sang Department of Science and Technology kag Food and Drug Aministration ang safety quality kag ka-epektibo sang bakuna.
Nahibaluan nga ginhangkat ni Senador Go sanday Duque kag vaccine czar Carlito Galvez Jr. nga mangin una nga makabaton sang bakuna agud nga engganyuhon ang mga Pilipino nga magpakuna man sa masunod nga tuig.
Samtang nagpabutyag man sang kahandaan si Vice President Leni Robredo nga mangin isa man sa mga una nga mabakunahan.
Suno sa bise presidente, dapat may yara sang maayo nga intensyon ang mga opisyal sang gobyerno sa pagbaton sang pagpanghangkat nga magpabakuna.
Nahibaluan nga ang mga health care workers amo ang nagapanguna sa listahan sang gobyerno nga makabaton sang COVID-19 vaccine.
