ILOILO CITY- Nag-absent na naman sa senate hearing subong nga adlaw sanday Department of Health (DOH) Secretary Francisco Duque III kag iban nga opisyal sang ahensya.
Ini may kaangtanan sa kwestiyonable nga paggamit sang DOH sang COVID-19 fund kag procurement sang COVID-10 supplies sang 2020.
Sa sulat nga naka-address kay panel chairman Senator Richard Gordon, ginpahayag ni Duque nga ginmanduan sila ni Presidente Rodrigo Duterte nga unahon ang iban nga importante nga COVID-19 response activities kun sa diin gintumod sini ang memorandum nga gin-isyu sang presidente sang Oktubre 4.
Ini na ang ikaduha nga tion nga wala nagtambong sa hearing ang mga DOH officials.
Suno kay Duque, epektibo sa gihapon ang memorandum order sang Presidente apang gin-athag niya nga padayon sila nga magakooperar sa kumitiba kag nagpangako nga isumiter ang tanan nga dokumento nga makabulig sa kumitiba sa ila ginapatigayon nga investigations in aid of legislation.
Matandaan nga gin-require ni Duterte ang iya Cabinet members nga magkuha sang clearance halin sa iya antes ang mga ini makatambong sa Senate investigation sa ginaalegar overpriced pandemic-related supplies nga ginbakal sang gobyerno.
