Pabor si Department of Health Secretary Francisco Duque III nga indi dapat pag i-block sang Executive Department ang mga testimoniya sang Cabinet members sa Senate investigation sa ginaalegar pagbakal sang gobyerno sang overpriced medical supplies sang 2020.
Suno kay Duque, kinahanglan nga magtambong sila sa imbestigasyon apang dapat man nga mag-focus sila sa public health emergency kag pagpadasig pa sang vaccination activities.
Apang panugyan sang tiglikom, mas maayo kun sa isa ka semana, kaisa lang ang hearing agud nga mahimo man nila ang ila obligasyon sa pagresponde sa pandemya.
Nahibaluan nga sang Oktubre 5, wala nagtambong sa Senate investigation sa Pharmally Pharmaceutical Corporation sanday Duque kag iban nga health officials.
Ang mga tiglawas lamang sang Commission on Audit, the Civil Service Commission, Bureau of Internal Revenue, kag Bureau of Customs ang nagtambong sa imbestigasyon.
Matandaan nga ginpirmahan ni Presidente Rodrigo Duterte ang memorandum nga nagamandu sa mga opisyal kag empleyado sang executive department nga ihatag ang ila oras kag effort sa pagpakig-away batuk sa COVID-19.
