ILOILO CITY – May yara sang salabton ang personnel sang Bureau of Fire Protection Region 6 nga ginapahayag nagpalugayawan apisar wala pa natapos ang iya quarantine period nga sa ulihe natukiban nga nagpositibo sa Coronavirus Disease 2019 (COVID-19).
Sa programa Dura lex sed lex, ginpahayag ni Atty. Charl Stuyver Moleño nga mapasakaan sang kaso ang firewoman nga halin sa Cebu bangud sa paglapas sa Republic Act 11332 ukon ang layi nga Mandatory Reporting of Notifiable Diseases and Health Events of Public Health Concern Act .
Magluwas sa firewoman, mapasakaan man sang kaso administratibo tungod sa gross misconduct, gross neglect of duty kag conduct prejudicial to the best interest of public service ang iban nga mga personnel sang Bureau of Fire Protection Region 6.
Kuntani suno kay Moleño, gin-report sang ahensya sa Iloilo City Government kun sa diin naka quarantine ang firewoman kag wala na gintago pa bangud ang Cebu City ang yara sa gihapon sa “high risk area”.
Obligado ang mga frontliners kag public officers nga hibaluon ang insakto nga protocol ilabi na subong nga may pademya.
Pahayag sang natungdan, may yara man sang salabton ang barko nga ginsakyan sang firewoman bangud base sa report, wala sa manifesto ang iya nga pangalan nga kuntani makabulig pa ini sa contact tracing.
Sa idalom sang RA 11332, may yara sang penalidad ukon multa nga baydan ang natungdan nga indi magnubo sa P20,000 kag indi man maglapaw sa P50,000 ukon pagka-preso sang indi magnubo sang isa ka bulan ukon indi man maglapaw sa anom ka bulan.
