‘Dura Lex Sed Lex’ — The law may be harsh, but it is the law.
Ini ang pahanumdom sang Department of the Interior and Local Government (DILG) sa syudad sang Iloilo kag Iloilo Province may kaangtanan sa pagsunod sa guidelines sang Inter-Agency Task Force (IATF) for the Management of Emerging Infectious Diseases.
Sa interview sang Bombo Radyo kay Atty. Cedric Jaranilla, legal officer sang DILG Region VI, iya ginpahayag nga bag-o magpasar sang ordinansa, nagakadapat tsikyaron kag tun-an sang mga local chief executive ang pagsulundan sang IATF.
Suno kay Jaranilla, katungdanan nila nga id-idan kag tsikyaron ang tanan nga pagsulundan nga ginapatuman sang kada lugar sa rehiyon kag siguraduhon nga nagasanto ini nga mga guidelines sa pagsulundan sang national government.
Apang suno kay Jaranilla, madamo sila sa gihapon sang nabaton nga mga reklamo may kaangtanan sa indi balanse nga mga pagsulundan.
Halimbawa na diri sa Iloilo City sa diin wala sang koordinasyon sa ila bahin sang ginpahalugan ang mga protocols sa syudad.
Bangud sini, ginapadal-an man nila gilayon ang mga local chief executive sang kasulatan agud makaayo kag mabalanse ang ginapatuman nga pagsulundan sa guidelines sang IATF kag malikawan ang pagsalangisag sang mga tawo sa kun ano ang nagakadapat sundon.
Dugang pa sang abogado, indi nila mahimo patumbayaan ang mga ginapatuman sang local government units bangud trabaho nila ang i-monitor kag siguraduhon nga nagasanto ang pagsulundan sang lokal nga mga gobyerno kag national government.
Nagpangabay naman si Jaranilla sa syudad sang Iloilo kag Iloilo Province sang koordinasyon sa DILG Region VI sa tion nga may pagsulundan nga ipagwa.
Apang gin-athag ni Jaranilla nga mahimo man makadirekta ang syudad kag probinsya sang Iloilo sang ila proposed guidelines sa IATF.
Nahibaluan nga santo sa pagsulundan sang IATF, sa mga lugar nga napaidalom sa MECQ status, ginadumilian ang operasyon sang Personal care services nga ginalakipan sang beauty salon, beauty parlors, nail spas, medical aesthetic clinics, cosmetic ukon derma clinics, reflexology, aesthetics, wellness and holistic centers, massage therapy, sports therapy establishments, kag establishments nga nagaprovide sang tanning services, body piercings, pagpa-tattoo, kag home service para sa nasambit nga mga aktibidad.
Apang sa syudad kag probinsya sang Iloilo, ginapahanugutan ang 30% on-site capacity nga operasyon sang beauty salons, beauty parlors, barbershops, kag nail spas, PROVIDED, nga nagasuksok sang face mask ang mga kustomer kag ang mga service providers samtang nakapaidalom ang probinsya sa Modified Enhanced Community Quarantine (MECQ) status tubtob sa Hunyo 30.
