Ginpanginwala ni former Punong Barangay Felix Dureza nga may nagakatabo sa iya nga termino nga C2C ukon convert-to-cash sa mga proyekto sa Barangay San Isidro, Jaro, Iloilo City.
Ini ang kasunod sang pahayag ni incumbent Punong Barangay Ronela Juaneza nga sang bag-o pa lang siya sa pwesto sang 2023, may nagpalapit anay sa iya nga mga kontraktor kag nag-tanyag sang C2C.
Base sa alegasyon ni Juaneza, nagsiling ang mga kontraktor nga nakaandan na ukon nangin “practice” na sa Barangay San Isidro ang C2C.
Diri kag nagsabat si Dureza bangud siya ang kapitan antes ang termino ni Juaneza.
Suno kay Dureza, ginasuli ni Juaneza ang istorya bangud siya ang matuod nga may C2C.
“Wala kami na ya ga-practice sang C2C nga ginahambal ya ah. Gina-suli ya na. Siya ya ang may C2C, indi kami, magguwa man na gihapon sa imbestigasyon, sa korte,” suno kay Dureza.
Dugang sini: “Ang opisyo ya — tama siya ka sagad mag-imbento sang istorya kag magbinutig. Indi na ko tani magsabat sang mga isyu kay wala kamatuoran galing kay ang iban gapamati, te ano panan-awan sa amon da?”
Pahayag sini, wala gid sang amo nga scheme sa iya termino bangud tuman sila ka istrikto kag nakahibalo sila nga ginadumilian ang amo nga bagay.
“Natapos ko 13 years ko nga termino [as punong barangay] wala gid ko ya kaso sa Ombudsman ukon sa diin na,” pahayag pa sang former Punong Barangay.
Ginhangkat man sini si Juaneza nga pamatud-an ang iya nga statement kag indi lang lunsay mga alegasyon.
“Indi siya sagid issue nga wala sang kamatuoran kay katigulang na sa iya. Gapang-imbento siya sang istorya,” suno pa kay Dureza. “Ang akon lang ma-advise sa iya, aregluhon ya ang iya problema, indi nga ang amon nga problema.”
Antes ang interview kay Dureza, una na ini nga nagkomento sa Facebook post sang Bombo Radyo kag gintawag si Juaneza nga “professional liar”, “professional Marites”, kag “super corrupt.”
Sa nauna kag separado nga komento ni Juaneza, ginsiling sini nga ang matuod nga may ihibalo sa C2C scheme amo ang Treasurer, ang Appropriations Chairman, kag ang Punong Barangay.
Sa ila barangay suno kay Juaneza, ang Treasurer kag ang Appropriations Chairman ang nagakonsabo, kag “lipong” ang ila kapitan.
“Ang tuod lang kag bukara nyo to sa Brgy. San Isidro Jaro ang blue book para makita ninyo remarks sang COA. Indi ko iya magpati nga wala sang C2C sa barangay,” dugang sini sa iya comment sa livestream sang Bombo Radyo.
Antes sini nga isyu, si Iloilo City Lone District Rep. Julienne “Jamjam” Baronda ang nagbuyagyag sa Bombo Radyo nga may naka-feedback sa iya nga may C2C nga nagakatabo diri sa syudad kag ginatulunga sang Barangay officials ang kwarta. Nagpaandam ang kongresista nga ipasaka ang reklamo sa Ombudsman.#
