Ginduso ang resolution sa Iloilo City Council nga nagapanawagan sa tanan nga mga barangay sa syudad nga mag-adoptar ukon mag-integrate sang solar power systems bilang alternatibo nga kuluhaan sang kuryente.
Sa interview sang Bombo Radyo kay Councilor Atty. Rommel Duron nga amo ang nag-file sang resolution, iya ginpahayag nga maayo nga energy source ang solar power ilabi na subong nga wala pa sang kasiguraduhan kun tubtub san-o ang giyera kag ang krisis nga dala sini sa langis.
Magluwas suno kay Duron nga makakinot sa operational power cost kag makabulig sa palibot, makapahagan-hagan man ini sang palas-anon sang distribution facility bangud sang ginalantaw nga pagsaka sang demand subong nga summer.
Na-mensyonar man sini ang net metering program ukon ang mekanismo kun sa diin mahimo mabaligya sang mga tag-iya sang solar panel sa utility grid ang sobra nga elektrisidad kabaylo sang credits.
Bangud sini, may yara sang buhin sa kabug-usan nga balayran sa kuryente sa kada bulan.
Una na nga ginpahayag sang Department of Energy nga mahimo na maproseso kag maaprubahan sa sulod sang duha ka semana ang aplikasyon para sa net metering gani nga mas mahapos na para sa konsumidor nga ma-manage ang ila balayran sa elektrisidad.
Suno pa sa konsehal, mangabay man ini sa Iloilo City Engineer’s Office kun paano makabulig sa mga barangay agud nga mapadasig ang pag-install sang solar panel.
Nagaplano man ang konsehal nga magpatawag sang committee hearing agud ma-istoryhan ini sang dugang kaupod sa mga eksperto sa solor power system.
Suno pa kay Duron, tun-an man nila kun mahimo ini ma-apply sa Iloilo City Government.
Sa subong, ginsiling sini nga 19% na ang nabuhin sa ila consumption sang kuryente sa Iloilo City Hall bangud sang four-day workweek ukon apat ka adlaw lamang nga in-person nga trabaho.#
